[豪食系列］是咁的，而家香港人工作壓力咁大，每日返工好似打仗咁，一到食晏時間，梗係要諗下辦法差下電啦！唔係下晝點捱喎！ （嗱嗱嗱！講明先啊，唔係我唔捱得架，而係打工真係好辛苦嘛！你明嘅！ ）作為香港人，最好嘅叉電方法，咪就係食好啲囉！行過灣仔，見到有間日本餐廳新開張，梗係要第一時間衝去試吓啦！
行到入去，車！換湯唔換藥！同前身有咩分別喎，無端端又要改過個名，無聊！ ！點都好，都係叫嘢食緊要啲！辛苦左成個禮拜，梗係要最豪叫個最貴架啦！一嚟到，嘩！啲海膽好似唔駛錢咁呀！側邊嘅帶子又多喎！HKD$268其實都唔算貴喎！最可惜係啲飯少啦，搞到我食晒啲飯都未食晒啲魚生！（我都估到你實話我無聊架啦！係度嫌人飯小！冇辦法啦我飯桶嚟架嘛！ ！吹咩！）姐係咁！得個大同多係冇用嘅！我哋呢啲，有要求架嘛！呢個魚生飯上面嘅刺身係新鮮嘅，不過唔知點解啲海膽有兩隻色喎，仲要唔同味喎，失色左啲囉！淺色個隻係鮮甜嘅，不過深色嗰隻就差少少啦，我又唔可以話佢唔甜嘅，不過唔夠新鮮囉！
我真係要講下個飯，佢唔係一般嘅飯嚟嘅，而係一啲有味嘅飯！啲飯黃黃地咁，配合啲魚生，加埋個效果又真係幾好噃！仲有啊！提提你！呢一個魚生飯或者係切粒果隻魚生飯，如果你食得辣嘅，最好就加辛口！因為個辛口係秘製嘅，個味道真係冇得頂架！我保證你出面一定食唔到！不過提提你！佢嘅辛口真係限量供應得好緊要，唔係成日去都會有！次次都會同你講一係話未返貨，一係話賣晒！所以最好係訂位嘅時候，同佢訂埋個辛口醬！如果唔係去到先發現冇得叫，咁就真係火都嚟啦！
木槙料理
灣仔皇后大道東202號QRE Plaza 28樓
Search